SoLa '15: Liecht & Fiischternis

Sunntig, 5. Juli

Am Sunnti, 5. Juli 2015, het z`Abentüür Sola gstartet. 24 Kind u 14 Leiter si miteme Car u zwöi Outos iz Toggeburg uf Ebnat-Kappel gfahre. Mit schwäre, riesegrosse Ruckseck isch di Truppe ner zum Lagerhuus Stotzweid gwanderet. Aschliessend hets es Spieli gä, wo aui z`Gländ kenne glehrt hei. Nacheme feine Znacht hei sech Kind i Gruppe im Fischtere düre Wald gschliche u si de farbige Lüchtstäbli gfougt. Enand z'verklüpfe het natürlech o drzue ghört. Zfriede u müed si ner aui ga pfuse!


Mäntig, 6. Juli

Nachem Morgefit hei Kind verschiedeni Workshops chönne mache. Armbändeli mache, Heubaue wärfe, Schlangebrot bache u anderi Aktivitäte si zur Uswahl gstande. Am Namitag hei d`Jungschärler (4.-6. Klass) e Wanderig gmacht u hei dert unter freiem Himmu übernachtet. D`Ameisli hei i Berlinerzelt gschlafe. Jede Abe hei es paar Leiter persönlechi Erlebnis mit Jesus verzeut. 


Dsiischtig, 7. Juli

E wunderbare Sunneufgang isch dr Start i dä Tag gsi. Am Morgen ischs drum gange Hiiwise z`fouge u e Schatz finde. Am Nami het jedes Kind usere Alubüchse u Draht es Pizzaöfeli bout u selber e Pizza beleit. Im Wald ga Holz hole u Füüre het natürlich o drzue ghört. Jede Tag hets o es Theater gä vor Familie Keller, wo Leiter jewils Situatione usem Alltag gspielt hei. 


Mittwuch, 8. Juli

Ir letschte Nacht hets recht gwitteret u o dr ganz Tag hets grägnet. Z`Chuchi-Team het üs wi jede Tag mit sehr feinem Esse verwöhnt. Am Nami isch Lagerhuus ines Kino verwandlet worde. Usserdäm isch dr Lagerkiosk fasch leer kouft worde.


Donnschtig, 8. Juli

Hüt hets für Giele u Modis es separats Programm gä. Giele hei im Wald müesse bewiese, dass sie richtegi Manne si. Dräck het da natürlech nid dörfe fähle. Modis heis da chli agnähmer gha. Enenad Frisure mache, schminke u e Gschicht vor Prinzenssin Juli hei drzue ghört. Am Nami hets Wasserspieli gä. Z` Highlight isch e Wasserballonschlüdere gsi. Bim Lagerfüür hei mir no e längi Gebätszit gmacht u es paar Kind hei ihres Läbe Jesus übergä. Eifach grossartig!


Fritig, 10. Juli

Ufrume u putze isch hüt ufem Programm gstande. Aui hei enand ghufe. Ner hei mir üs uf Heireis gmacht. Mir si vom Car abghout worde. In Züri simer i Stou cho. Di meischte Kind si so müed gsi, dass ine Ouge zuegheit si.

Müed aber glücklich simer ner aui in Uetedorf acho wo üs Eutere u Gschwüschterti 

bereits erwartet hei.


Danke für Unterstützig im Gebät u Nahrigsmittu!

 

Aui Biuder gits hie.


~~||~~

 

fus

 


Kommentar schreiben

Kommentare: 0