Mumpse-Cup

Mumpse-Cup 2014 - Tagebuch von Mumps

10:02 Uhr, beim EGW Uetendorf

"Schnüff-schnüff; grr, wuff - wüffel! Oh, i muess äue d Sprach no wächsle... Sodeli; itz sötts ga:

Hallo liebs Tagebuech! Ig bis, der Mumps! Der chlii blau Hung vor Junsgschi, wo aujahr uf ne Megagigareis geit. Hui, i bi scho ganz ufgregt. Jedes Jahr darfi wider für nes Jahr zum ne Ching hei. Aber i ga doch nid eifach so zu irgendöpperem! Nenei, da wähli de scho chli besser us. Es git e Wettbewerb, wo d Ching um mi müesse kämpfe, jaja! 

Dasjahr gömer aui uf St. Stephan, i nes grüümigs Lagerhuus. Dert chöi de d Mumpsechrieger ihri Fähigkeite i de Kategorie Wüsse, Gschicklechkeit u Chraft unger Bewiis steue. Am Schluss bechöme si, sofern si de o gwunne hei, e riese Pokal aus belohnig! Weni chönnt, de würdi dä o wöue gwinne... Aber i bi natürlech der Houptpriis! So, aber itz höri uf schwätze, i muess ga d Ching i Empfang nä, süsch git mer das de es Heideghetto! Bis grad!

 

10:52 Uhr, im Kofferraum

Oooh wie isches mir schlächt! Du gloubsch gar nid, die kurvigi Strecki hie ufe isch nid grad sehr agnähm! U Platz het me o -- AUA! Was sticht mer da i Rügge? Ohjee, der Pokau isch uf mi abe gheit! Wener nume no ganz isch... Wo bini blibe stah? Ah ja: Me het ke Platz. Aber scho glii si mer dert, u de gits de ändlech wider früschi Luft... Itz schlafi aber gloub no e Rundi. Mäude mi de vo dobe wider!

 

11:42 Uhr, Viehschauplatz St. Stephan

Sodeli, mir si ahcho! Läck, isch das e Trubu! U aui die Ching... Ui, mi Buuch chnurret. I ha äbe doch langsam Hunger. Aber bevors öppis z Mampfe git, loufe mer zum Huus u d Sa verzeut üs no öppis über ds Zämeläbe im ne Lagerhuus. Me söu enang gärn ha - das faut mir auso gar nid schwer, die Ching si aui der Oberhammer! Itz hani mir es Mittagspöiseli aber redlech verdienet.

 

13:22 Uhr, Schulhausplatz St. Stephan

Ach isch das Herrlech, die Sunne! So schön! Aber eigentlech geits ja um de Wettbewerb da. Aui si ganz konzentriert. Si müesse Gäud verdiene, indem si vo Poste zu Poste gö u verschiedeni Ufgabe löse. Zum Bispiu: Teebüteli-Wiitwurf, Bibuvärs-Uswändiglehre, Balanciertechnik uf d Prob steue, Ballondart u no ganz viu angers. Si si aui emsig ihres Gäud am erwirtschafte, das isch es luschtigs Aluege. Aber i la mi itz no chli am Buuch la chräbele u vo der Sunne la werme...

15:02 Uhr, gleicher Ort

Eh, was isch o das? Mi Buuch mäudet sech ume. Herrje, es isch ja scho Zvieri-Zit! Dasch de schnäu gange. Weli Gruppe füehrt äch? Zu wäm darfi ner de ga? Ah das isch no gheim, soso.. Jä de muesi mi äue no chli gedulde! I isse itz afe mau dä Öpfu da... Aso nid öppe der Fuu! Sondern sone schöne rote knackige, mjam!

15:22 Uhr, ein bisschen weiter links als vorher

U scho wider si aui 25 Ching am ihri Ufgabe erfüue. Dene isches gloub ärnst! He, säget mau, dir zwe: Machts nech Spass? Ja? Sehr kuul! U gwinneter de o? Ja? Auso ii wär mer de da nid eso sicher... Mir gsehs ja de!

 

19:12 Uhr, Aufenthaltsraum Lagerhaus

Nachdem mir es feins Znacht vo üsere Lagerchuchi hei dörfe verspise, sitze mer itz aui da uf de gnüetleche Sofas im Ufenthautsruum. Gspannt lose mer am Felix zue, wo üs chli öppis über Sieg u Niederlag verzeut. Scho no es interessants Thema! Aber nachem Input und em Singe chunnt de no der best Teil: Ds Nachtspili! Da fröii mi scho uh lang druf!

 

21:32 Uhr, Hinter dem Haus

Ufem Mars heisi Wasser gfunge, in Form vo Iis. das müesse d Ching itz ga sueche, u ner mit dem es Getränk parat mache. Ohoh, die einti Gruppe griift da aber chli uf unkonventionelli Mittu zrügg! Aber gwinne duet niemer, es si beidi exakt gliichzitig fertig. Was hets gä? IceTea! So fein... Itz no es Bettmümpfeli, u ner ab in die Heia, de möge mer morn wider uf!

07:52 Uhr, Bett

Uuuuah, guete Morge auersits! Uii, hani guet gschlafe. Itz aber schnäu zum Zmorge abe! I ha scho wider so ne Bäre- eeh, dänk e Hundehunger... Ja, das Lagerläbe macht hungrig! Aber zersch no schnäu der Schlafsack zämetue, hurti ds Gröbschte id Täsche schiesse, so. De bini de när bis zur Priisverleihig nid mit packe beschäftiget, sondern cha de Ching ga zueluege we si nomau Spili mache! Aber vorhär verzeut ja de der Leo no öppis. O öppis mega interessants, über Talent und so!

 

10:42 Uhr, Keller

Öh, was isch de da los? Ih, da hetts de komischi Sache! Ah nei, das si ja Autagsgägeständ. D Ching müesse derdür loufe, Sache abeschlücke, probiere, azündte... - aber wieso de das? Aha, aus klar: Si bechöme ihre Jungschiname! So kuul he!

 

12:02 Uhr, Essraum

Was frisst die Kuh, was frisst die Kuh? - Heu, Heu Heu!

Was gibt sie dann, was gibt sie dann? - Milch, Milch, Milch!

Wer mellkt sie denn, wer melkt sie denn? - Hugo, Hugo, Hugo!

Ääää Guete mitenang!!!

 

14:22 Uhr, vor dem Haus

Ändlech isches so wit! Itz wärde d Sieger gehrt. Ouu bini Ufgregt! Zu wäm darfi es Jahr lang ga pfüsle? Glii chunnts us! Oha, es wird vorgläse. Achtung, ufpasse! Uuuund: "U gwunne hei der dasjährig Mumpsecup der Sven Portner u der Simon Bichsel! Ja aber Momänteli mau, i ch ja gar nid zu zwöine Lüt glichzitig, de müessti mi ja haubiere! Aha, es chunnt no e Schetzfrag. Der Simon isch necher drann, u itz isches definitiv: I darf zum Simon! Das fröit mi mega!

 

15:02 Uhr, Viehschauplatz St. Stephan

Scho verbi. Schnäu gange isches! Aber i fröie mi uf mis nöie Deheime, bim Simon! Itz geits wider ab ids Outo, Öigeli zue und heizue fahremer...

Bis zum nächste Jahr!

 

Liebs Grüessli, 

öie MUMPS ;-)

 

We de aui Biudli wosch aluege, gang doch bir Galerie verbii!

 

~~||~~

 

sno


Kommentar schreiben

Kommentare: 0